6ستمبر 1965کو پاک فوج نے مکار دشمن کے دانت کھٹے کئے ، مقبوضہ کشمیر کے بھائیوں اور بہنوں کوسلام پیش کرتاہوں:آرمی چیف کا یوم دفاع کی تقریب سے خطاب
آرمی چیف جنرل قمر جاوید باجوہ نے کہاہے کہ پاک فوج نے 6ستمبر 1965کو مکار دشمن کے دانت کھٹے کئے ،جمہوریت آئین کی بالا دستی کے بغیر نہیں پنپ سکتی ، اس موقع پر مقبوضہ کشمیر کے بھائیوں اور بہنوں کوسلام پیش کرتا ہوں جو لازوال قربانیوں کی تار یخ رقم کررہے ہیں۔
تفصیلات کے مطابق جی ایچ کیو میں یوم دفاع کی مرکزی تقریب سے خطاب کرتے ہوئے آرمی چیف جنرل قمر جاوید باجوہ نے کہا کہ یوم دفاع شہدائے پاکستان سے اظہار یکجہتی کا دن ہے ۔ دفاع پاکستان کے لئے ہم سب یکجا ہیں۔ 6ستمبر 1965کا دن ہمار ی تاریخ کا ایک اہم دن ہے جب پاکستان کی فوج نے قوم کی مدد سے مکار دشمن کے دانت کھٹے کئے ۔ہمارے جوا ن آگ میں کود پڑے لیکن وطن پر آنچ نہیں آنے
دی ۔دفاع وطن کے لئے ہم سب یکجان ہیں۔زندہ قومیں اپنے شہداءکوکبھی نہیں بھولتیں اور اپنے شہدا کو بھولنے والی قومیں مٹ جاتی ہیں۔ انہوں نے کہا کہ 1965اور 1971کی جنگوں سے بہت کچھ سیکھا ۔ ہم نے اپنا دفاع ناقابل تسخیر کرلیا ، ہم نے ملک کو ایٹمی قوت بنایا لیکن بعد میں ہمیں دہشت گردی کے ذریعے اندرونی طورپر کمزور کرنے کی کوشش کی گئی ۔ دہشت گردی کے خلاف جنگ میں 70ہزار پاکستانی شہید اور زخمی ہوئے ،ہمارے گھروں ، سکولوں اور قائدین پر حملے کئے گئے ۔
انہوں نے کہا کہ مسلح افواج اور قوم کی قربانیوں سے ہم نے دہشتگردی کو شکست دی ۔ہم پاکستانی کسی سے گھبرانے والے نہیں ہیں، ہم نے بہت سے قربانیاں دی ہیں لیکن کام ابھی ختم نہیں ہوا۔ اس لئے ہم ان قربانیوں کویاد رکھتے کیلئے یوم دفاع کے ساتھ یوم شہدا بھی مناتے ہیں۔ ہم نے بہت سے قربانیاں دی ہیں لیکن جنگ ابھی جاری ہے ۔ ہم نے ملک کی تعمیر ترقی کو یقینی بناناہے اور اس کو اس نہج تک پہنچانا ہے
کہ کوئی ہم کو میلی نظر سے نہ دیکھ سکے ۔ اس جنگ کے ساتھ ساتھ ہماری دوسری جنگ غربت اور افلا س کے خلاف ہے ۔ ملک کی یکجہتی اورترقی کے لئے جمہوریت کا تسلسل بہت ضروری ہے لیکن جمہوریت آئین بالادستی کے بغیر پنپ نہیں سکتی اور اس کا آغاز آج سے دس برس قبل سے ہوچکاہے۔ انہوں نے کہا کہ اس موقع پر میں مقبوضہ کشمیر کے بھائیوں اور بہنوں کو بھی سلام پیش کرتاہوں جو قربانیوں کی لاوزوال تاریخ رقم کررہے ہیں۔ میں شہداءکی قربانیوں کو سلام پیش کرتاہوں۔ پاک فوج زندہ باد پاکستان پائندہ باد