ڈاکٹر عمرسیف کو 10 ہزار ڈالر فی گھنٹہ کی نوکری کی پیشکش
اسلام آباد(ڈیلی پاکستان آن لائن )حکومت نے چیئرمین پی آئی ٹی بی ڈاکٹر عمر سیف کو عہدے سے ہٹانے کا فیصلہ کر لیاہے جس پر ان کے والد میدان میں آ گئے ہیں اور ان کا کہنا ہے کہ عمر سیف کو بل گیٹس سمیت متعدد ممالک نے آٹی کی وزارت اور دس ہزار ڈالر فی گھنٹہ دینے کی پیشکش کر دی ہے ۔
عمر سیف کے والد کرنل ریٹائرڈ سیف نے بیٹے کی برطرفی پر افسوس کا اظہار کرتے ہوئے کہا کہ تقسیم ہند کے وقت ہم بھارت سے پاکستان آ ئے ، ہم پر قاتلانہ حملے ہوئے مگر ہم نے اپنی جائے پناہ پاکستان کو ہی سمجھا، میرے والدین نے میری اچھی تربیت کی اور میں فوج میں ساری عمر خدمات سرانجام دے کر کرنل کے عہدے سے ریٹائرڈ ہوا۔ان کا کہناتھا کہ پاکستان سے محبت کی وجہ سے اللہ نے مجھے عمر سیف جیسا بیٹا عطا کیا،دنیا میں سالانہ ڈیڑھ لاکھ پی ایچ ڈی ہولڈر میں سے کوئی ایک بھی ایسا نہیں جو میرے بیٹے کا مقابلہ کر سکے۔ان کا کہنا تھا کہ میرا بیٹا ان تمام باتوں کے باوجود پاکستان سے جانے کے لیے تیار نہیں ہے، جب سے ڈاکٹر عمر سیف کو عہدے دے ہٹایا گیا ہے متعدد غیر ملکی سفیروں نے ان کے گھر کا رخ کرلیا ہے ،جو ان کو وزارت انفارمیشن ٹیکنالوجی کا قلمدان سونپنے کے لیے تیار ہیں جبکہ بل گیٹس عمر سیف کو ایک گھنٹے کی کنسلٹنسی کے عوض 10 ہزار ڈالر تک کا معاوضہ دینے کو راضی ہیں۔