حمیرہ اصغر کی نماز جنازہ

کراچی: اداکارہ اور ماڈل حمیرا اصغر کی موت سے متعلق ابتدائی پوسٹ مارٹم رپورٹ منظر عام پر آ گئی ہے۔

رپورٹ میں بتایا گیا ہے کہ ان کی لاش 8 سے 10 ماہ پرانی ہے، جس پر کسی قسم کے تشدد یا ہڈیوں کے ٹوٹنے کے آثار نہیں ملے۔ لاش مکمل طور پر گل سڑ چکی تھی اور چہرے سمیت جسم کے کئی حصے پٹھوں سے خالی تھے۔

رپورٹ کے مطابق، اداکارہ کے جسم کی تمام ہڈیاں مکمل حالت میں موجود تھیں، تاہم لمبی ہڈیاں نازک اور سوراخ دار ہو چکی تھیں جبکہ جوڑ غیر معمولی طور پر حرکت کرنے کے قابل تھے۔ چھاتیوں میں موجود سلیکون امپلانٹس بھی محفوظ حالت میں پائے گئے۔

جنسی زیادتی یا زخموں کے کوئی واضع شواہد رپورٹ میں موجود نہیں۔ چہرے کے پٹھے غائب تھے، دانت اپنی جگہ پر ڈھیلے تھے، جبکہ جلد سخت اور سیاہ دھبوں سے بھری ہوئی تھی۔ بال اور کپڑوں کے نمونے کیمیائی تجزیے کے لیے لیب بھجوا دیے گئے ہیں۔

پولیس اور فرانزک ٹیمیں واقعے کی مزید تفتیش میں مصروف ہیں تاکہ موت کی اصل وجہ معلوم کی جا سکے۔ واضح رہے کہ تین روز قبل اداکارہ کی لاش ان کے فلیٹ سے برآمد ہوئی تھی۔