لوٹی دولت کی واپسی، 100 کرپٹ ترین افراد پر ہاتھ ڈالنے کا فیصلہ
حکومت نے قومی دولت لوٹنے والے 100 کرپٹ ترین افراد پر ہاتھ ڈالنے کا فیصلہ کر لیا، لوٹی دولت کی واپسی کے لئے خصوصی یونٹ بھی قائم کر دیا گیا، لوٹی دولت میں واپسی میں معاونت فراہم کرنے والے کو 20 فیصد رقم دی جائے گی۔وزیرِاعظم عمران خان کے زیرِ صدارت وفاقی کابینہ کا اہم اجلاس، لوٹی ہوئی قومی دولت بیرونِ ملک سے واپس لانے کا عزم،
وزیرِاعظم ہاؤس میں شعبہ قائم، بیرونِ ملک غیر قانونی جائیدادیں اور دولت رکھنے والے 100 افراد کی فہرست تیار کر لی گئی۔اجلاس کے بعد میڈیا کو تفصیلات سے آگاہ کرتے وفاقی وزیرِ اطلاعات فواد چودھری نے بتایا کہ کابینہ نے فیصلہ کیا ہے کہ مدارس اور سکولوں میں یکساں
نصاب تعلیم رائج کیا جائے گا۔وزیرِاعظم کے معاون خصوصی برائے احتساب بیرسٹر شہزاد اکبر نے کہا کہ قوم کی لوٹی ہوئی دولت واپس لانے پر کوئی سمجھوتا نہیں کیا جائے گا۔کابینہ اجلاس میں تربیلا ڈیم کے توسیع منصوبے میں کرپشن سے قومی خزانے کو پہنچنے والے 25 ارب روپے نقصان کی تحقیقات کی بھی منظوری دے دی گئی۔وزیرِ اطلاعات فواد چودھری کا کہنا تھا کہ وزیرِاعظم کے صوبدیدی فنڈ واپس کرنے سے قومی خزانے کو 80 ارب روپے کا فائدہ ہوا۔