بھارتی کارروائی میں درختوں کی ’شہادت‘، پاکستان کا اقوام متحدہ میں ماحولیاتی دہشتگردی کا مقدمہ درج کرانے کا اعلان
پاکستان کی جانب سے بھارت کے خلاف اقوام متحدہ میں ماحولیاتی دہشتگردی کا مقدمہ درج کرانے کا اعلان کردیا گیا ۔
وزیر اعظم کے مشیر برائے ماحولیاتی تبدیلی امین اسلم کا کہنا ہے کہ بھارت نے 26 فروری کو پاکستان میں جنگل پر بمباری کی۔ طیاروں نے جنگل میں اپنا پے لوڈ بھی گرایا جس کے نتیجے میں پاکستان کے بلین ٹری سونامی منصوبے کو نقصان پہنچا ، اس لیے بھارت کے خلاف اقوام متحدہ میں ماحولیاتی دہشتگردی کا مقدمہ درج کرایا جائے گا۔
وزیر اعظم کے مشیر نے مزید کہا کہ بلین ٹری سونامی صرف پاکستان کی بہتری کا منصوبہ نہیں ہے بلکہ اس کو عالمی تنظیموں نے بھی سراہا ہے اور اس کی اہمیت کو تسلیم کیا ہے۔
خیال رہے کہ بھارتی فضائیہ کے طیاروں نے ایل او سی پر پاکستانی حدود کی خلاف ورزی کرتے ہوئے بالاکوٹ میں جنگل میں 4 بم گرائے تھے۔ پاک فضائیہ کے طیاروں نے جب بھارتی سورماﺅں کو چیلنج کیا تو وہ اپنا پے لوڈ بھی جنگل پر گرا کر بھاگ گئے تھے جس کے نتیجے میں کئی درخت متاثر ہوئے تھے۔
